Babayeng gikan niduaw sa CCJ gipatay
CEBU, Philippines - Natagak sa gisakyan nga habal-habal ug nakabsan sa iyang kinabuhi sulod sa tambalanan ang usa ka babaye human kini gipusil sa nagsunod niini nga kriminal nga sakay ‘sab og motorsiklo diha sa Sitio Pang-Panglanog, Upper Kalunasan, Barangay Kalunasan ning dakbayan sa Sugbo niadtong nakalabay nga hapon.
Ang biktima naila nga si Rodelyn Almario, 44, nagpuyo sa Sitio Kalubihan, Barangay Sambag 1.
Matud pa sa hepe sa Homicide section sa Cebu City Police Office, Senior Inspector Elisandro Quijano nga nahinabi sa Banat News nga sa pagkakaron drugas ang ilang nakita nga motibo sa maong krimen.
Sumala pa ni Quijano gikan ang biktima sa Cebu City Jail human kini miduaw sa napriso niini nga kapuyo gumikan sa kaso sa drugas.
Sa iyang pag-uli sakay sa usa ka habal-habal gisundan kini sa kriminal ug pag-abot sa maong lugar gipusil makaduha ka higayon sa iyang likod.
Gumikan sa kakurat sa drayber sa habal-habal mipasutoy na kini og pagpadagan hangtod nga nahulog sa motorsiklo ang biktima.
Sumala pa sa mga nakakita nga usa ka itom nga XRM ang gisakyan sa duha ka kriminal nga pulos nagsuot og helmet.
Dali unta nga gidala sa Vicente Sotto Memorial Medical Center ang biktima apan pipila ka oras ang nakalabay nakabsan kini sa iyang kinabuhi. (Jojo C. Ugdol/EIM)(BANAT NEWS)
- Latest
