CV alerto batok NPA
CEBU, Philippines - Wala’y kompiyansa karon ang kapolisan sa rehiyon-7 ilabi na sa mga lugar nga duna’y presensya sa New People’s Army (NPA).
Kini human sa pagpangatake nga gihimo sa Mati, Davao nga gikaangol sa polis ug pagkamatay sa mga sundawo human nabuthan og landmine atol unta sa ilang pagresponde.
Gitug-an ni Sr. Supt. Paul Labra, hepe sa Regional Intelligence Division, nga nihatag na siya og kamanduan sa tanang buhatan sa kapolisan lukop rehiyon nga mohimo og dugang pag-alerto, pagkuha ug pagpahugot sa intelligence gathering apil ang subsob nga checkpoint sa mga lugar ilabi na sa mga lugar nga adunay mga NPA. Matud ni Labra nga ang pagpangatake sa mga NPA sa Mati Police Station nagpakita nga sila dunay igo’ng puwersa nga makahimo og kagubot.
Sa Central Visayas bugtong ang probinsiya sa Negros Oriental lang ang duna’y problema sa NPA ug dili sab parehas kalig-on sa mga probinsiya sa Davao, pasabot pa ni Labra.
Sigun pa sa opisyal nga nagpadayun sab ang ilang hugot nga monitoring sa palibot ubos sa tabang sa ubang intelligence unit aron paghatag og proteksiyon sa publiko. (BANAT NEWS)
- Latest
