Kauban ni Apduhan ni-plead not guilty

CEBU, Philippines - Mi-plead not guilty sa gipahigayong arraignment sa kasong murder ang kauban sa pagpatay sa usa ka 16- anyos nga batang lalaki sulod sa mansion sa lider sa gidudahang kulto nga si Casiano "Tatay Loloy" Apduhan.

Si Zacarias Barquio mi-plead not guilty sa atubangan sa sala ni Judge Ruben Altobar sa Branch 29. Si Barqiuo apil sa gisikop ug gilambigit sa pagpatay ni Angelo Repuela.

Samtang laing usa pa nga gituohang suspek nga si Victor Fajardo nagpabilin nga gawasnon.

Subay sa maong kasong murder nipresentar usab si Cebu Vice Governor Agnes Magpale ug si Remegia Repuela inahan ni Angelo sa pagpamatuod sa gisumpaang pamahayag nga si Apduhan ang nipatay sa maong bata.

Sa Marso 19 gikatakda nga mopresentar og laing witness ang prosekusyon.

Sa laing bahin gipahigayon usab ang laing pagdungog sa kasong illegal detention batok ni Apduhan kagahapon sa buntag may labot sa pagtanggong niini kang Emma Nepomuceno sa iyang balay sa Barangay Buanoy lungsod sa Balamban.

Sa gipahigayong pagdungog sa sala ni Judge Hermes Montero sa Branch 59 Palace of Justice Toledo City miduso usab og petisyon ang kampo ni Apduhan sa kasong illegal detention.

Si Heddah Largo, consultant sa Provincial Women's Commission (PWC) malaumon nga dili tugutan sa korte nga makapiyansa si Apduhan sa illegal detention sanglit non-bailable ang maong kaso, ang kaso hukman karong Hunyo 9, 2015.

Gawas sa kasong murder ug illegal detention nag-atubang usab og kaso nga Republic Act 9208 o Expanded Anti Trafficking in Persons Act of 2012 si Apduhan. (BANAT NEWS)