Pagpabalik ni Garces sa PSWDO
CEBU, Philippines - Ang kagamhanan sa probinsiya miduso og Motion for Reconsideration (MR) kabahin sa resolusyon sa Civil Service Commission (CSC) nga nagmando sa pagpabalik ni Marivic Garces sa posisyon isip hepe sa Provincial Social Welfare and Development Office (PSWDO).
Gawas niini, si Gob. Hilario Davide III gimanduan sa pagbayad sa Representation and Travel Allowance (RATA) kang Garces sukad sa iyang pagkalagpot gikan sa posisyon niadtong Enero 8, 2013.
Si Garces natudlo nga mapermanente sa iyang posisyon niadtong Hunyo 20, 2006 apan niadtong Enero 7, 2013 ubos sa Memorandum 2013-09 ni kanhi acting governor nga karon Bise Gobernador Agnes Magpale si Garces gi-reassign ngadto sa Integrated Provincial Health Office. Niadtong Pebrero 5, 2015 miduso og MR ang kagamhanan sa probinsiya sa nahisgutang resolusyon nga giluwatan sa CSC niadtong Enero 13, 2015.
Si provincial legal officer Orvi Ortega mipasabot nga ang isyu sa reinstatement ni Garces “mooted” na kini tungod kay ang order kanhi ni Magpale panahon pa kadto nga nasuspenso si kanhi gobernador Gwendolyn Garcia.
Dihang si Garcia mibalik sa posisyon human sa pagkasuspenso niini miluwat siya og memorandum order niadtong Hunyo 19, 2013 sa pagpabalik kang Garces sa posisyon niini.
Gawas sa motion for reconsideration ngadto sa CSC miapelar usab sila ngadto sa Court of Appeals kabahin sa desisyon sa CSC. Giklaro usab ni Ortega nga ang provincial legal office isip abogado ni Magpale wala makadawat og kopya sa Motion for Execution. (BANAT NEWS)
- Latest
