Mga kapitan lakip sa nihangyo

CEBU, Philippines – Nagpatabang ang mga kapitan sa lungsod sa Daanbantayan sa mga opisyal sa Kapitolyo sa bangi tali ni Mayor Augusto Corro ug mga konsehal sa lungsod.

Sila si Gob. Hilario Davide III ug Bise Gob. Agnes Magpale ang gihangyo sa mga kapitan sa barangay Bakhawan, Tapilon, Paypay, Bitoon, Bagay, Dalingding ug Malbago.

Gitakda karong Huwebes o Biyernes nga abuton ang mayor ug ang mga konsehal aron hisgutan nila ang gikasungian nga mga proyekto nga gastohan sa World Bank apan may tugbang ang munisipyo nga huwamon gikan sa Land Bank of the Philippines.

Matud sa gobernador nga paningkamutan niya’ng makombinser ang mga konsehal tungod kay nakita niya nga maayo ang tumong sa mayor alang sa kaayohan sa lungsod.

Ang Municipal Development Council (MDC) niduso sa P885 milyones nga balor sa mga proyekto apan gibasura sa mayoriya sa mga konsehal. – /GMR) (BANAT NEWS)