Duha natagakan og container van

CEBU, Philippines – Grabeng naangol ang usa ka motorista ug ang usa ka babaye dihang natagakan silang duha sa 20- footer van nga karga sa gikasugat nilang trak diha sa Sitio Calderohan, Barangay Maguikay, Dakbayan sa Mandaue.

Si Police Officer 2 Ruben Serdena, imbestigador sa Traffic Division sa Mandaue City Police Office (MCPO) miila sa mga biktima nga mao si Leonardo Ceniza Jr., 49, taga Barangay Tingob sa maong dakbayan.

Samtang naangol usab si Cristel Sumogat, 18, nagpuyo sa maong dapit tungod sa mga pangos ug bun-og sa lawas dihang nasukamod kini samtang nidagan kini palayo sa container van apan natapsingan gihapon siya niini.

Matud pa ni Serdena nga nagsakay sa iyang motorsiklo si Ceniza pauli sa ilang panimalay ug nakasugat ang trak nga gimaneho ni Albert Simbajon, 49, taga Barangay Maguikay sa maong dakbayan.

Ang trak dunay karga nga tulo ka 20-footer van apan giingong nasabod kini sa nagyungyong nga kable sa kuryente hinungdan sa pagkatagak sa usa niini. Maayo na lang nga wala kini sulod.

Maayong pagkaigo sa agtang ni Ceniza sa kilid sa container van nga natagak hinungdan sa dakong kadaut nga iyang naangkon sa iyang mata.

Ang motorsiklo ni Ceniza maayo nga pagkapiyapi sa pangunahang ligid. Samtang si Sumogat kinsa naglakaw lang daplin sa karsada natapsingan usab.

Si Simbajon gitanggong na sa detention cell sa Presinto 4 sa MCPO alang sa pagpasaka og kaso. – /EIM) (BANAT NEWS)