Ahente sa Tanduay gitulis

CEBU, Philippines – Lain na sab nga ahente ang gitulis sa lungsod sa San Fernando diin ang mga tulisan sakay sa usa ka motorsiklo bisan pa man sa kahayag sa adlaw sa barangay San Isidro sa maong lungsod pasado alas 11 sa nakalabay nga buntag.

Ang mga biktima naila nga sila si Julier Luzano, 29, salesman nga taga Kinasang-an Pardo; Herbert Coveno, 29, helper , taga Pinamungajan ug Guinanas Guiwanon, 44, drayber nga taga Carmen nga pulos nagtrabaho sa Tanduay Distillers Incorporated sa dakbayan sa Mandaue.

Matud ni PO3 Marjukin Misuari nga samtang namalit og uling ang mga biktima niabot ang usa ka motorsiklo sakay ang tulo ka lalaki ug duha niini ang nanaug sa motorsiklo dayun ti-on og armas sa mga biktima.

Si Coveno ug Guiwanon ang gipasulod sa mga tulisan sa likod sa ilang delivery van samtang si Luzano ang gidala sa atubangan sa ilang sakyanan.

Nakuha sa mga tulisan ang sling bag ni Luzano nga aduna’y P30,000 nga ilang kita sa pagpangolekta ug cellphone nga P17,000.

Human sa pagpanulis, nisibat ang mga tulisan paingon sa dakbayan sa Naga ug ang plate number sa motorsiklo gitaptapan samtang nagtabon sa nawong ang mga tulisan ug pulos armado sa .45 pistol.

Kini ang ika-duha nga pagpanulis sa maong lugar sulod niini’ng buwana human sa pagtulis sa usa ka ahente sa sigarilyo sa niaging semana nga nakuhaan og P20,000. – /GMR) (BANAT NEWS)