Sakyanan paliton para sa makililimos
CEBU, Philippines – Nangayo og sakyanan ang Cebu City Anti-Mendicancy Office aron kuno magamit nila nga pasakyan sa mga tawo, apil ang mga bata’ng libudsuroy nga ilang ma-rescue gikan sa kadalanan nga nagpakilimos.
Matud ni Isabelita Ganub nga maoy tagdumala sa City Anti-Mendicancy Office nga pagka karon usa ra g’yud ang sakyanan sa ilang opisina nga magamit kun mohimo sila og operasyon batok sa mga makililimos.
Adunay bag-ong programa ang dakbayan sa Sugbo nga ang City Anti-Mendicancy Office maoy gitahasan pagpatuman sa gitawag og Transformation of street dwellers and street children.
Si Ganub miingon nga kinahanglan sila og duha ka sakyanan aron hingpit nga ma-implementar ang programa ug kini gamiton sa rescue teams nga idistino sa North ug South districts.
Ang gisugyot nga sakyanan nga paliton Mitsubishi L300 nga nagkantidad og P900 mil ang matag usa. Si Mayor Michael Rama miaprobar na sa pagpalit sa maong mga sakyanan.
Si Konsehal Gerardo Carillo miduso na og resolusyon didto sa City Council apan wala dayon aprobahi sa mga konsehal ang hangyo kay himoan pa og dugang pakisusi. – /RUB) (BANAT NEWS)
- Latest
