Balay sa village gilungkab

CEBU, Philippines - Gilungkab sa wala mailhing kawatan ang balay sulod sa usa ka village ug nasakiyo ang kapin sa P150 mil nga alahas ug mga gamit nga nadiskubrehan kagahapon sa kadlawon sa barangay Banilad, dakbayan sa Sugbo.

Gipanag-iya ang maong mga butang ni Heartyell Crown Bravante, 28, nga naglangkub sa bracelet nga P50 mil, singsing nga diamante nga P55 mil, pitaka ug mga gadgets nga mobalor og P45 mil lakip na ang cash nga P7 mil.

Sa pagsusi sa mga sakop sa Theft and Robbery Section sa Cebu City Police Office nasuta nga ang kawatan nakasulod pinaagi sa paglungkab sa sliding door sa ikaduhang andana sa maong balay.

Nakakuha og mga finger prints ang mga sakop sa Crime Scene Investigation Unit sa crime scene nga ipa-ubos pa sa makuti’ng pagtuon aron pag-ila sa responsabli sa krimen.  (BANAT NEWS)