Valentine’s gift sa mga babaye’ng polis

CEBU, Philippines - Gihatagan og buwak, cupcakes ug cookies ang 28 ka babaye nga polis sa Cebu City Police Office kagahapon sa buntag atol sa Pre-Valentine’s Day celebration sa hawanan sa Camp Sotero Cabahug.

Gikan kang CCPO acting director Sr. Supt. Conrad Capa, ang maong mga regalo apan ang usa sa mga lokal nga artista sa ABS-CBN nga si Borgie Cabigas isip special guest ang nitunol niini.

Apil sa gihatagan sa maong gasa ang mga babaye’ng sakop sa media.

Matud ni Supt. Arnel Banzon, deputy director sa CCPO, nga ang maong kalihukan gihimo aron pagpakita sa pagpangga ug sa importansiya sa mga babaye’ng polis sa ilang buhatan.

Si Insp. Arieza Otida, hepe sa Women and Children’s Protection Desk sa CCPO, niingon nga kini ang una’ng higayun nga nakadawat og buwak panahon sa adlaw sa gugma. (Jojo C. Ugdol/GMR)(BANAT NEWS)