Chalk ipadala sa mga drivers

CEBU, Philippines - Ang mga drivers nga malambigit sa vehicular accident sa siyudad sa Sugbo mao na ang mohimo sa markings sa dalan aron maminusan ang problema sa trapiko panahon sa panagbangga.

Ang mga public utility driver gikinahanglang magdala og chalk aron gamiton sa pagmarka sa dapit nga nahitaboan sa aksidente gawas kun dunay naangol o namatay.

Si City Administrator, Dr. Lucelle Mercado, nipasabot nga ang chalk ug wax crayon gamiton sa pagmarka sa dapit kun diin nahitabo ang aksidente sa sakyanan aron mahawan dayun ang dalan ug malikayan ang grabeng pagbara sa trapiko.

Ang driver sa de pasaheroan nga sakyanan nga pakyas sa pagdala og chalk o bisan unsa nga magamit sa markings, siya dakpon ug pamultahon og tag P1,000 subay sa ordinansa nga napasar niadto’ng Oktobre 2002.

Human sa marking sa dalan nga nahitaboan, ang sakyanan ipadaplin aron dili grabe’ng maapektuhan ang dagan sa trapiko. (Kristine B. Quintas/GMR)(BANAT NEWS)