Diarrhea outbreak kontrolado na
CEBU, Philippines - Kontrolado na ang “diarrhea outbreak” nga nahitabo sa Cebu Mitsumi Inc. sa siyudad sa Danao sumala pa sa Regional Epidemiology and Surveillance Unit (RESU-7).
Si Renan Cimafranca, sa RESU-7 miingon nga ni-menus na karon ang nagpakonsulta sa doctor tungod sa pagdaot sa ilang tiyan.
Ang Regional Director sa Department of Health sa Central Visayas Dr. Jaime Bernadas miasoy, ang nahitabo sa dul-an 200 ka mga empleyado sa Cebu Mitsumi Inc. gitawag og Acute Watery High Volume Diarrhea nga usa ka sintomas sa sakit nga Cholera.
Base sa opisyal nga listahan nga gipagawas sa maong kompaniya, 147 ang nagpakonsulta samtang 39 ang na-admit sa tambalanan.
Gumikan sa maong hitabo, ang DOH-7 mipagawas og rekomendasyon alang sa dinalian nga pagtambal sa mga pasyente lakip na ang pagpahigayon og inspeksyon sa tinubdan sa tubig ug pag-regulate sa mga baligyang pagkaon duol sa pabrika.
Pagpanakit sa tiyan ug ang pagsuka maoy sagad nga nasinati sa mga trabahante.
Si Bernadas nanghinaot nga dili na masubli ang maong insidente, dunay tulo ka kan-anan duol sa pabrika ang gipasirad-an kay way sanitary permits ug uban pang dokumento. (Decemay P. Padilla/EIM)(BANAT NEWS)
- Latest
