Sobra 100 gikalibanga

CEBU, Philippines - Gikatahong kapin sa 100 nga kawani sa Mitsumi sa dakbayan sa Danao ang nagkalibanga tungod sa tubig nga ilang nainom gikan sa ilang water fountain.

Si Rennan Cimafranca, unit head sa Regional Epidemiology Surveillance Unit (RESU) mibutyag nga base sa talaan sa klinika sa pabrika mikabat ngadto sa 147 ka kawani ang giingong gikalibanga.

Sa report nga nadawat sa RESU-7 nga unang insidente nahitabo niadto pang Martes ug nasundan niadtong Miyerkules.

Matud ni Cimafranca nga 13 sa maong mga pasyente ang na-admit sa Velez Hospital ug 25 diha sa Mendero Medical Center sa lungsod sa Consolacion. Gibutyag ni Cimafranca nga gisubay pa nila ang ubang mga pasyente kung asa nga mga tambalanan nagpa-admit.

Matud niya nanguha na sila og sample sa mga pagkaon nga gipamaligya diha sa gawas sa pabrika lakip na sa pagkaon gikan sa canteen sa sulod sa pabrika ug sa tubig gikan sa water station niini aron mapaubos sa eksaminasyon.

Ang hepe sa City Provincial Hospital sa dakbayan sa Danao nga si Prudencio Manubag mibutyag nga duha ka kawani sa pabrika kinsa nagkalibanga ang na-admit sa ilang tambalanan niadtong Lunes ug Miyerkules.

Si Trishia Cabreros sa information desk sa Mitsumi nga nakahinabi sa Banat News sa telepono nagkanayon nga ang mga opisyal sa pabrika nagpahigayon og meeting kabahin sa maong insidente.

Dugang ni Cabreros nga dunay gipahigayong imbestigasyon usab sa maong hitabo pagpiho sa hinungdan sa kalibanga sa mga kawani sa pabrika.

Si Gobernador Hilario Davide III nagkanayon nga ipaimbestigar niya sa Provincial Health Office (PHO) ang insidente.  (BANAT NEWS)