Stove mibuto, vendors ug mga estudyante nangapaso

CEBU, Philippines – Mokabat sa 15 ka mga tawo ang gitabang ug ang uban nadala sa tambalanan human nangapaso dihang usa ka kerosene gas stove sa usa ka vendor sa food park sa Cebu Technological University Main Campus sa MJ Cuenco Avenue ang mibuto ug nasunog ang mga stalls kagahapon sa buntag.

Matud pa ni Senior Fire Officer 1 Tristan Tadatada sa Cebu City Bureau of Fire Protection nga ilang nadawat ang alarma sa sunog alas 8:15 sa buntag ug nakontrol sud sa kinse minutos.

Ang mga sakop sa Emergency Response Unit Foundation (ERUF) nga maoy unang nakaresponde maoy nagdala sa mga nangapaso sa tambalanan ug ang uban gidala sab sa clinic sa maong unibersidad.

Sumala pa ni Tadatada nga ang tag-iya sa stove nga nibuto nga si Arenato Catarongan, 41, nakaangkon usab og 2nd degree burn sa kalawasan.

Nangapaso usab ang ubang vendors nga sila si Fibua Lauron, 35, Jelly Ann Dedicatoria, 17, Jenelyn Tuburan, 15, ug Janice Tabar, 40.

Samtang duna sa’y mga estudyante nga nakaangkon og ginagmay nga paso nga naila nga sila si Analiza Esplagura, 24, Nympha Oybines, 19, Charish Lynn Barinaga, 17, Diane Terol, 16, Gracelyn Cordova, 18, Judy Ann Uy, 17, Epifanio Dayangco, 17, Sidney Patrick Casul, 17, Marjon Banggo, 19 ug usa ka admistrative officer sa maong tunghaan nga si Clemente Español, 61.

Ang university doctor sa maong tunghaan nga si Dr. Rogelio Villamor miingon nga ginagmay ra ang paso sa ubang mga estudyante gawas kang Barinaga nga gidala sa Cebu City Medical Center kay kini nalipong human nakahanggab sa aso.

Ang imbestigador sa kabomberohan miingon nga gumikan sa pressure sa tubo sa gas stove ang hinungdan sa pagbuto.

Napulo ka mga stalls ang naugdaw ug duha ka partially damage, diin kini nagbilin og P20,000 nga danyos. – /EIM) (BANAT NEWS)