Nangalisbong basura sa VSMMC nahipos na
CEBU, Philippines – Nahipos na ang nagtipun-og nga basura sa likod nga bahin sa Vicente Sotto Memorial Medical Center nga gireklamo tungod sa baho nga alisbo niini.
Pasabot pa ni VSMMC housekeeping chief Ma. Victoria Villarojo, misanong ang dakbayan sa Sugbo sa ilang awhag nga kolektahon ang mga basura nga usa na ka buwan nga wala makuha.
Niadtong Miyerkules sa niaging semana gisugdan og hakot sa mga garbage trucks sa dakbayan ang mga basura, onse ka trak sa Department of Public Services ang nihakot niini.
"Nag overtime intawon among mga personnel kay gabii man tig- anhi to collect ang truck," matud ni Villarojo.
Personal nga gisiguro ni Cebu City administrator Dr. Lucelle Mercado nga gikolekta sa mga tinugyanan sa DPS ang general wastes sa VSMMC.
Si DPS chief Engr. Rolando Ardosa ang personal nga nakigtagbo kang VSMMC chief of hospital Dr. Gerardo Aquino ug gipasabot sila niini nga maong wala nila kolektaha ang basura tungod kay wala kini matarong og bahig sa malata ug dili malata.
Gani, gipamulta og P500 sa City Environmental Sanitation and Enforcement Team (CESET) ang VSMMC human makita ang usa ka diaper gikan sa general waste sa ospital kagahapong adlawa.
Ang diaper usa ka infectious hospital waste ug dili angay’ng itipon sa general waste o kadtong kumon nga maoy ilabay sa landfill.
Aron di na kini mausab, ang VSMMC mipahibaw nga sila maghimo og kaugalingong solid waste management system pinaagi sa paggamit og non-burn microwave shredder aron dili na sila magsalig sa pagkolekta gikan sa DPS aron mahipos ang mga basura sa ospital.
Matud pang Villarojo responsibilidad g’yud sa matag pasyente, watcher, empleyado lakip na ang mga doktor ug nars ang pagbahig sa basura. – /EIM) (BANAT NEWS)
- Latest
