Private donors nitabang

CEBU, Philippines – Human nalubong ang duha ka Special Action Force (SAF) commandos, nakadawat og tabang pinansiyal ang ilang pamilya, atol sa flag raising ceremony sa Police Regional Office -7 kagahapon sa buntag.

Sila si Dr. Christine Cempron, asawa ni PO1 Romeo Cempron; Michelle Candano, asawa ni PO1 Wendel Candano ug Brenda Remosora, iyaan ni Irene Guialon nga kapuyo ni PO3 Junrel Kibete, nakadawat og tag P97,000 matag usa.

Sila si Nimrod Quiñones, general manager sa Alta Vista Golf and Country Club; Nelson Yuvallos sa Cebu Country Club ug Prudencio Gesta, chairman sa Regional Advisory Council, ang nitunol sa hinabang.

Sa mensahe sa director sa PRO-7, Chief Supt. Prudencio Bañas, kini miingon nga nasubo sila sa nahitabo sa 44 ka SAF troopers.

Gipasalamatan ni Bañas ang publiko sa gipakita nga gugma ug kaayo sa pagsimpatiya sa nahitabo nga nakahatag og kalig-on sa mga pamilya.

Si Bañas niingon sayud na sila’ng daan nga sa pagdawat sa mga polis sa tahas, sila sab nasayud nga moabot ang panahon nga posible’ng mobuhis sila sa ilang kinabuhi ug kini nakita sa opisyal sa gihimo sa SAF.

“They served and sacrificed for a purpose far greater more than themselves, and indeed they have fit in the true essence of a hero… and that is why their ultimate sacrifice means so much,” sumala pa ni Bañas.

Sa pagpakighinabi sa mga tigbalita ni Dr. Cempron kini mapasalamaton sa publiko sa suporta nga iyang nakita bisan og dili pa niya kini mga paryente o kaila.

Kini miingon nga wala pa nakahunahuna kung unsa ang iyang gastohan sa mga nadawat niya nga tabang pinansiyal ilabina karon nga nakadawat na sab kini og susama’ng tabang gikan sa pribadong sektor.

Si Dr. Cempron nipasabot nga ang mga salapi nga tabang nga iyang nadawat karon nagpakita lang sa sakripisyo nga gihimo sa ilang bana.

Apan sa gihapon hustisya ang gipangayo sa pamilya sa SAF troopers.

Matud pa nga unta dili mabutang lang sa kalimot ang nahitabo sa Mamasapano, Maguindanao ug matuldokan ug matapos ang imbestigasyon sa maong hitabo pinaagi sa paghatag sa tinuoray nga hustisya ug masayran ang tinuod nga hitabo. – /GMR) (BANAT NEWS)