Maestro, 23 tawo sikop

CEBU, Philippines – Gidakop sa mga sakop sa National Bureau of Investigation-7 ang usa ka maestro sa usa ka language school ug laing 22 ka mga tawo ug menor de edad sa buy-bust operation sa Barangay Ward 2, Minglanilla.

Matud pa ni NBI-7 Regional Director Ricardo Diaz, ang subject sa ilang operation mao silang John Harold Aledon, 22, ug Aljun Abella, 26, nga usa ka maestro.  Lakip sa gidakop si Roberto Heredia, 54, human masuta nga siya ang nanag- iya sa drug den nga diin nasakpan ang mga dinakpan.

Matud ni Diaz laing 20 pa ka tawo nadakpan tungod kay anaa sila sa maong dapit, tulo kanila mga bata. Ang maong mga gidakop ipaubos pa sa imbestigasyon kung nag-unsa sila sa maong dapit.

Atol sa operasyon, nakuha sa NBI ang lain-laing drug paraphernalia sud sa drug den ug 20 ka gramo nga shabu.

Si Heredia kasohan og kalapasan sa Section 6 (maintenance of drug den), Article II of Republic Act 9165 otherwise known as Comprehensive Dangerous Drugs Act.

Matud ni Diaz nga si Aledon ug Abella pasakaan og kasong pagbaligya ug paghupot og ginadiling drugas.

Apan si Abella mihimakak sa pasangil ug mialegar kini nga migawas lang siya sa ilaha tungod sa komosyon sa gawas apan nakurat siya nga giapil siya og sikop ug giposasan sa mga sakop sa NBI. Miangkon hinuon siya nga nakahibalo siya nga dunay paryente nila nga namaligya og ginadiling drugas nga kauban nila sa balay apan lahi og kwarto ug pultahan.

Matud niya sa pagdakop kaniya naapektuhan ang iyang trabaho.

Samtang ang 13-anyos nga lalaki nga tinun-an sa Grade 4 nga lakip sa tulo ka mga batang giapil og dakop nagkanayon nga naglingkod ra siya sa daplin kay padung magduwa og basketball dihang giapil siya og dakop sa NBI.

Si Diaz mibutyag nga kun masuta nila nga ang pag-adto nila sa maong lugar di lehitimo ang rason ipasa nila sila sa Department of Social Welfare and Development. – /EIM) (BANAT NEWS)