P300T nga shabu nasakmit
CEBU, Philippines – Mokabat sa kapin P300 mil nga kantidad sa drugas ang nasakmit sa Balamban Police gikan sa tulo ka mga lalaki sa managlahing buy-bust operations.
Unang nadakpan si Paul Padilla Sanchez, 34, diha sa barangay Luca nga nakuhaan og duha ka gagmay ug usa ka medium size paketeng gituohang shabu ug usa ka .45 caliber pistol ug cellphone.
Sa gihimo nga interogasyon ang suspek mitug-an kinsa ang mga tighatud kaniya og shabu nga mao si Joselito Abaquita, 39, taga dakbayan sa Talisay hinungdan nga gihimo ang laing operasyon.
Si Abaquita mikubit sa laang sa mga polis gamit ang cellphone ni Sanchez ug gipalitan kini og napulo ka gramo nga shabu, apan mitubag pa kini nga 25 gramos ang iyang ihatud duol sa usa ka mall sa Balamban diin usab kini nadakpan.
Apil sa gisikop ang drayber ni Abaquita nga si Rodrigo Batucan, 41, taga Minglanilla. Nakuha sa kapulisan ang 23 gramos nga gituohang shabu nga mikantidad og P271, 400. Sa kinatibuk-an, P341,000 nga kantidad sa shabu ang nasakmit sa kapulisan. – /EIM) (BANAT NEWS)
- Latest
