COA mimando nga iuli ang P21.59M
CEBU, Philippines – Miluwat og notice of disallowance ang Commission on Audit (COA) ngadto sa kagamhanan sa Dakbayan sa Mandaue tungod sa pagpagawas niini sa mokabat P21.59 milyones nga kantidad nga cash incentives ngadto sa mga dili regular nga mga kawani.
Si Mayor Jonas Cortes ug uban pang mga opisyal sa dakbayan gihatagan sa COA og unom ka bulan aron moapelar sa maong desisyon sa COA. Kun mapakyas sila sa paghimo og lakang bahin niini mahimo na kining final ug hingpit nga ipatuman.
Sila si Cortes, Bise Mayor Glenn Bercede ug ang 11 ka mga sakop sa konseho ang nakadawat sa notice of disallowance niadto pang Hunyo 27, 2014 ug subli na usab silang gipadad-an niadtong Pebrero 4 niining tuiga.
Hinuon si City Treasurer Regal Oliva nga nahinabi sa mga tigbalita miingon nga mo-file sila og motion for reconsideration tungod kay katungod man kini sa mga opisyal sa dakbayan.
Gibutyag hinuon ni Oliva nga ang job order (JO) nga kawani, clean and green ug ang mga barangay health and nutrition workers (BHNW) nga apil sa nakadawat sa maong cash incentives uyon nga iuli ang nadawat nilang cash assistance kun maoy mando sa COA.
Kahinumdoman nga ang konseho sa dakbayan mipalabang og ordinansa niadtong Nobiyembre 21, 2013 nga nagtugot sa paghatag og cash incentives sa mga JO, clean and green ug BHNW.
Ang 2,000 ka mga JO workers nakadawat og P5,000 ug gamay pa niini ang nadawat sa 200 ka Clean and Green workers ug 60 ka mga BHNW. – /EIM) (BANAT NEWS)
- Latest
