Sub-contractor sa condo nangawat
CEBU, Philippines - Nasikop sa guwardiya ug gitugyan sa mga sakop sa City Intelligence Branch ang sub-contractor sa usa ka condominium human gipasanginlan nga nanglungkab sa usa ka yunit sa barangay Apas, dakbayan sa Sugbo.
Ang nasikop naila nga si Joel Garcia, 40, taga Duljo-Fatima, Cebu City nga nasakpan sa tag-iya sa condo unit nga iyang gilungkab.
Base sa imbestigasyon nasayran nga ang suspek milungkab sa kuwarto ni Aprille Mae Borja, 27, call center agent, samtang natulog ang biktima.
Gamit sa suspek ang usa ka identification card aron mo-slide ang lock sa pultahan sa maong yunit.
Gikuha sa suspek ang mga gamit sa biktima nga mokabat sa P63 mil nga naglakip sa iPhone ug uban pa.
Diha’ng padulong na mogawas ang biktima kalit lang nitingog ang cellphone hinungdan nga nakamata ang biktima ug nikaratil og dagan ang suspek. Gigukod sa biktima ug naabot gyud sila sa lobby ug naapsan ug niuli sa butang.
Nataymingan sa security guard nga nag-roving niadto’ng higayuna ang suspek hinungdan nga nikaratil na sab og dagan ang suspek apan nasikop.
Diha’ng gidala na ang suspek sa CIB kini niangkon nga nanglungkab sa laing condo unit sa maong building nga mokabat og usa ka milyon ka pesos ang nasakiyo. (BANAT NEWS)
- Latest
