P2M batok drugas sa probinsiya

CEBU, Philippines - Gihugtan sa kagamhanan sa probinsiya sa Sugbo ang kampaniya batok sa ginadiling drugas pinaagi sa “Just Say No” program.

Si Bokal Carmen Remedios Meca, chairman sa committee on anti-illegal drug abuse prevention sa hunta probinsiyal, nibutyag nga ang probinsiya nigahin og P2 milyones karong tuiga alang sa programa.

Ang probinsiya magpahigayun og mga seminars sa kabarangayan ug kalungsuran batok sa ginadiling drugas.

Matud ni Meca nga dili nila masulbad siyento porsiyento ang problema sa ginadiling drugas apan nihimo sila og lakang nga matibhangan ang maong problema.

Lakip sa programa mao ang pagpalig-on sa anti-drug abuse council sa kabarangayan.

Tinguha sa probinsiya ang pag-recognize sa outstanding local government unit (LGU) sa kampanya bahin sa problema sa ginadiling drugas.

Ang probinsiya adunay performance scorecard system sa pag-evaluate sa ilang gihimo’ng aksiyon batok sa ginadiling drugas.

Ang performance scorecard system gilangkuban sa lima ka criteria diin duha niini mao ang organization and functionality of anti-drug abuse council ug LGU policies o mga balaud nga gipanday batok sa ilegal nga drugas.

Dugang ni Meca nga sa sustainability sa programa, duna sila’y gisuporta nga ordinansa sa probinsiya aron mapadayun bisan kinsa pa ang molingkod nga mamunoan sa kagamhanan. (Brenda D. Batuto/GMR)(BANAT NEWS)