Iring mibangon lima ka adlaw human gilubong

CEBU, Philippines – Usa ka iring  didto sa Tampa, Florida ang gikataho nga mibangon lima ka adlaw human kini gilubong sa iyang  agalon. Gisaysay ni Ellis Hutson nga iyang gilubong ang iyang iring nga si Bart human kini niya makit-i nga nagbuy-od sa dalan ug wala na magginhawa sa  dihang naligsan og awto. "I couldn't stand to bury the cat," matud pa sa 52-anyos nga si Hutson sigun sa taho sa Tampa Bay Times. Mao kini ang hinungdan nga iyang  gipamalihogan ang ilang silingan nga si Dave aron maoy molubong niini duol sa ilang balay.  Apan paglabay sa lima ka adlaw, mibangon si Bart  gikan sa lubnganan ug namarayeg sa balay sa silingan ni Hutson nga si Dusty Albritton aron mangayo og pagkaon.

"At first it blew me away," asoy pa ni Albritton. "All I knew was this cat was dead."

Sa ilang paghiling kang Bart, ilang nasuta nga nabali ang apapangig niini, dunay samad sa mata ug gisi sa nawong, grabe ka- dehydrated ug gutom kaayo. Si Albritton nagkanayon nga sa sinugdanan wa siya makahibalo sa iyang buhaton kay sukad-masukad karon pa siya makakita sa ingon. Mitawag dayon siya og mga beterenaryo sa wala pa makig-alayon sa Humane Society of Tampa Bay, nga maoy mitanyag nga moatiman sa iring. Si Bart dali nga gi-operahan ug gipaabot nga mamaayo kini paglabay sa unom ka semana. (miamiherald.com/EIM) (BANAT NEWS)