Night high schools target sa pushers

CEBU, Philippines – Dunay mga tunghaan dinhi sa Sugbo nga gipanid-an sa City Intelligence Branch tungod sa report nga dunay mga tawong namaligya og drugas duol sa maong mga tunghaan ug ang mga tigpalitan mga estudyante.

Gitug-an sa hepe sa CIB sa Cebu City Police Office Superintendent Romeo Santander nga ilaha kining nabantayan human nasikop ang usa ka level 3 drug pusher niadtong nakalabay nga adlaw duol sa usa ka tunghaan nga barangay Apas. Ang nadakpan mao si Madie Parreño, 28.

Sumala pa ni Santander nga naalarma sila sa maong hitabo kay base sa nakuha nilang impormasyon, mga estudyante ang ilang mga kustomer ilabi na kadtong nagtungha sa night classes. “Medyo lain na kaayo paminawon, especially mga estudyante sa night school ang costumers,” matud pa ni Santander.

Usa sa gitug-an sa hepe sa CIB nga mga tunghaan nahimutang sa Barangay Mambaling, Apas ug uban pa. Gawas sa shabu, ang maong mga pushers namaligya usab og marijuana sa mga estudyante.

Plano ni Santander nga pakigtagboan ang kapitan sa barangay Apas aron ‘sab masabotan kauban ang taga Philippine Drug Enforcement Agency (PDEA7) ang maong problema. Gawas kang Parreño, nadakpan usab ang laing duha ka mga lalaki nga giingong paingon nang manuyop og drugas diha sa usa ka abandonadong balay, sila mao si Alexander Macap, 21, ug Roger Hiba, 28, pulos taga Sitio Mahayahay sa maong barangay. – /EIM) (BANAT NEWS)