Gibarang namusil

CEBU, Philippines – Usa ka lalaking nagduda nga siya gibarang ug gipadautan miunay pagpatay sa tulo ug miangol sa usa nga pulos niya mga paryente diha sa Sitio Lawod Barangay Buot, bukirang bahin sa dakbayan sa Sugbo niadtong miaging gabii.

Ang mga biktima mao ang magsuon nga sila si Jeffrey Cabucayan, 23, Jerome Cabucayan, 19, ug ang ilang silingan nga si Gerardo Tangayan, 46, samtang naangol ang anak niini nga 16-anyos.

Ang suspetsado kinsa mikatkat sa ibabaw sa lubi aron sa pagtago mitahan human makombinsir sa mga sakop sa City Public Safety Company sa Cebu City Police Office nga naila nga si Renato Cabradilla, 30. Sa paghinabi sa Banat News sa suspetsado kini miingon nga wala gayod kini nagmahay sa pagpatay sa tulo ka mga tawo bisan og suod niya sila nga mga higala ug ig-agaw ang usa sa namatay.

Si Cabradilla nagduda nga siya gihiloan ni Jeffrey samtang sila nanaygon sa dakbayan sa Danao niadtong nakalabay nga Disyembre kay matud niya, sukad nakakaon siya niadto nagsugod na ang dili maayo niyang gipamati ug nilaygay iyang lawas ug nagkaanam siya og kaniwang.

Samtang ang laing duha ka mga namatay iyang gipasanginlang wala magpakabana sa iyang kahimtang hinungdan sa iyang kapungot.  “Wala ko nagmahay sir uy, grabe ang gihimo nila nako,” matud pa ni Cabradilla kinsa mibutyag sa report sa Balitang Bisdak kagahapon sa hapon nga gibarang, gipadautan ug gilaygay siya subay sa gibutyag kaniya sa tambalan.

Ang pagpamusil nahitabo pasado alas- 7 sa gabii samtang nagkuyog ang suspetsado ug ang magsuong Cabucayan. Si Tangayan nga didto sulod sa iyang balay  pagkadungog sa buto-buto dali unta nga misusi sa gawas apan giapil kini sa pagpusil, ang 16-anyos nga anak niining dalagita natapsingan sa kilid sa tiyan.

Si Magdalena Ocariza, iya-an sa suspetsado miingon nga hasta siya gisulayan pagpusil sa suspek apan mikagar ang armas sa suspetsado.

“Maayo na lang kay naa’y Ginoo, kaupat niya gikablit ang iyang armas wala mibuto, pasalamat kaayo ko sa Ginoo,” saysay pa ni Lola Ocariza sa Banat News.

Si Ocariza kinsa makamaong manambal gamit ang herbal medicines nagduda nga siya ang tuyo sa suspetsado kay nagduda kini nga siya maoy nagpabarang niini. Nadakpan ang suspek sa bakilid ug tangason nga bahin usa ka kilometro ang gilay-on gikan sa ilang balay human gitug-anan sa kapuyo sa suspek ang kapolisan.

“Nakit-an namo ni siya sa taas lubi, amo na lang gipakanaog, minaog pud siya kay gutom na daw siya,” matud pa ni Police Officer 3 Julito Elarcosa.

Apil sa gisikop sa kapulisan ang manghod sa suspetsado nga si Junrey nga gitudlo sa mga silingan nga kuyog sa suspetsado atol sa paghimo sa krimen.

Narekober sa kapulisan sa crime scene ang usa ka bala sa .38 revolver, usa ka basiyo sa bala sa susamang kalibre apan wala na nakuha ang armas human nga gilabay na daw sa suspetsado. – /EIM) (BANAT NEWS)