Drugas ug armas nasakmit sa kapolisan
CEBU, Philippines – Mga gidudahang nalambigit sa ilegal nga drugas, nadakpan sa managlahing police operations sa Mandaue City, Liloan ug Consolacion.
Ang nadakpan sa buy-bust operation sa Sitio Cambiohan, Barangay Casili, Liloan nasakmitan og P153,400 nga kantidad sa shabu nga giilang si Lenel Borgos Gerondio, 35.
Ang suspek gikatahong napalitan og lima ka paketeng shabu sa polis hinungdan nga kini gidakop, sa pagrekisa kaniya nakuhaan pa kini og dugang duha ka dagkong paketeng shabu, napulo ka gagmay ug mga drug paraphernalia.
Samtang sa operasyon sa Mandaue City Intelligence Branch (CIB) , nadakpan sa buy -bust operation diha sa Sitio Lemonsito, Barangay Umapad si Jessie James Maxilom, 25 ug Robin Entrampas, 41, human matud pa mibaligya og tagsa ka paketeng shabu sa mga polis.
Samtang sa laing operasyon nga gihimo sa Zone Sibuyas, Barangay Paknaan nadakpan usab si Reynaldo Palma, 45, nga nakuhaan og onse ka paketeng shabu, usa ka .38 kalibre nga rebolber nga dunay upat ka bala.
Sa laing bahin, gipasakaan na og kaso sa ilegal nga pagpamaligya og shabu ang tulo ka tawo nga nadakpan sa Liloan Police Station nga sila si Ruelito Barcenas, 36, Edwin Noval, 39, Brayan Baya, 31, ug ang target sa buy-bust nga nakasibat nga si Raymond Baya. – /EIM) (BANAT NEWS)
- Latest
