Babaye patay, konsehal, laing 2 angol sa aksidente

CEBU, Philippines - Usa ka barangay konsehal sa dakbayan sa Mandaue naangol human nagbangga ang gisakyan nga motorsiklo ug laing sakyanan sa Dalahikan, lungsod sa Samboan pasado alas 12 sa udto niadto’ng Domingo. Matud ni Police Officer 1 Marphy Tolentin sa Samboan Police Station nga si Konsehal Benedicto Albano, 49, residente sa Wireless, Subangdaku, dakbayan sa Mandaue, nagbiyahe gamit ang motorsiklo uban ang kapin sa 20 ka tawo aron motan-aw sa kanindot sa Aguinid Falls sa lungsod sa Samboan. Sa pag-abot sa kurbadaho’ng bahin, aksidente’ng nagbangga sa gikasugat nga sakyanan nga gimaneho ni Gleen Llenos, 39, kinsa padulong sa dakbayan sa Sugbo.

Dali’ng gidala sa tambalan si Albano gumikan sa naangkon nga bun-og ug samad sa lain-laing parte sa lawas samtang si Llenos nipasalig nga moabaga sa gasto sa tambalanan.

Sa laing bahin, patay ang usa ka babaye ug samdan ang duha ka kauban human naligsi og Toyota Vios samtang nagbarug kilid sa highway sa barangay Bahay, lungsod sa Sibonga niadtong Domingo sa buntag. Si Adelyn Cabunada, 29-anyos, nakaangkon og grabe nga kadaut sa ulo ug gideklarar nga dead on arrival sa Carcar District Hospital samtang ang iyang anak nga si Jamesly, 8-anyos ug igsuon nga si Ginalyn Buracho, 24-anyos, anaa sa kritikal nga kondisyon sa Vicente Sotto Memorial Medical Center. Base sa imbestigasyon sa kapolisan nga nagpaabot sa highway ang mga biktima og bus paingon sa Carcar dihang gibanggaan sa sakyanan ni Exequel Morata, 57-anyos, kinsa gikan sa dakbayan sa Sugbo ug paingon sa barangay Lindogon, Sibonga.

Matud ni Police Officer 2 Ederlino Bakusno sa Sibonga Police Station nga si Morata niangkon nga normal ra ang iyang dagan ug wala siya nakabantay sa kurbada hinungdan nga iyang giusab ang iyang direksyon paingon sa gibarugan sa mga biktima apan nawad-an kini og kontrol sa sakyanan.

Boluntaryo hinuon nga nikuyog si Morata sa kapolisan pagkahuman sa insidente ug kasamtangan nga natanggong sa Sibonga Police Station samtang nagpaabot nga pasakaan og kaso.  (BANAT NEWS)