P1 kunhod sa plete sa traysikol

CEBU, Philippines - Nauyonan sa mga traysikol drivers sa tanang rota sa dakbayan sa Lapu-Lapu ang P1 nga kunhod sa pletehan base sa ilang giduso nga resolusyon atol sa public hearing kagahapon.

Ang public hearing gipahigayun sa Lapu-Lapu City Hall nga gitambungan nila ni City Administrator, Atty. Yuri Biluan, Konsehal Eduardo Cuizon ug Efren Gerero ug sa mga sakop sa Lapu-Lapu Confederation of Tricycle Operators and Drivers Association (LACTODA).

Niadto’ng Enero 22 sa usa ka consultative meeting nga gipahigayun sa buhatan ni Mayor Paz Radaza, gituki ang pagpaminus sa pletehan nunot sa padayun nga pagkunhod sa presyo sa mga produkto’ng petrolyo.

Si Cuizon kinsa maoy chairman sa committee on transportation niingon nga mas maayo nga duna’y ordinansa nga mapasar aron malikayan ang mga kakulian.

Ang presidente sa LACTODA, Felix Gila, niingon nga nauyunan sa iyang mga sakop ang P1 nga kunhod sa pletehan ug gani duna na’y pipila nga boluntaryo nga nipatuman niini samtang nagpaabot sa ordinansa sa konseho.

Gihulagway nga daku kini og matabang sa mga sumasakay tungod kay dunay pipila kanila ang nireklamo ngano’ng wala kunhuri ang pletehan bisan og barato na ang presyo sa krudo ug gasolina. (BANAT NEWS)