Pusher napusilan sa buy-bust
CEBU, Philippines - Naangol ang usa sa tulo ka gikatahapang drug pushers nga nadakpan human napusilan sa kapolisan sa managlahi’ng buy-bust operation sa dakbayan sa Mandaue. Ang naangol mao si Alexander Parilla, taga Zone Paliya, barangay Paknaan.
Matud ni Police Senior Inspector Hugo Rio sa City Intelligence Branch sa Mandaue City Police Office (MCPO) nga nakamatikod si Parilla nga polis ang ilang police decoy hinungdan nga nisuway unta sa pagpanunggab.
Dali nga nakalikay ang police decoy hinungdan nga wala maigo ug misuway unta sa pagdagan si Parilla apan dali kini’ng gipusil sa bitiis hinungdan sa pagkaangol ug nasikop.
Nakuha gikan sa suspek ang usa ka pakete’ng shabu nga nagkantidad og P200, usa ka kutsilyo nga 22-pulgada ang gitas-on nga naglakip sa pul-an.
Dugang ebidensiya nga nakuha gikan sa suspek ang .22 kalibre nga armas nga gisulod sa gidala nga waist bag.
Nasayran nga una’ng nadakpan nila ni Rio ang suspetsadong pusher og shabu nga si Aldrin Molit, 30, nga taga Zone Camote sa barangay Paknaan.
Si Molit naaktohan nila’ng Rio diha’ng ang ilang police decoy nipalit niini og shabu hinungdan sa pagkasakmit sa usa ka pakete ug P200 nga marked money. Nadakpan usab sa team ni Senior Inspector Miguel Andeza sa buy-bust operation sa barangay Tipolo ang gikatahapang pusher nga si Dwight Cabalida Sanoria, 34, nga nagpuyo sa maong dapit.
Nunot sa pagkasikop ni Cabalida, ilang nasakmit ang tulo ka pakete’ng shabu ug marked money nga maoy gigamit sa ilang police decoy sa pagpalit og shabu. (BANAT NEWS)
- Latest
