Nagselos nagpusil sa ulo

CEBU, Philippines – Kritikal ang kahimtang sa usa ka lalaki kinsa nagpusil sa iyang kaugalingon atubangan sa kapuyo sa sitio Missionaries, barangay Suba, dakbayan sa Sugbo pasado alas 9 sa niaging gabii.

Ang naghikog naila nga si Adonis Yburan, 28, kargador og isda sa Pasil Fish Port ug nagpuyo sa maong lugar.

Matud ni SPO1 Ruth Violango, imbestigador sa homicide section sa Cebu City Police Office, nga selos ug problema sa pamilya ang giingong hinungdan sa paghikog ni Yburan. Ang kapuyo nga minor de edad niingon nga dihang bag-o pa lang sila nahuman og panihapon nagkalalis sila gumikan sa pagselos ni Yburan sa mga lalaki nga nagpuyo sa ilang gipuy-an.

Gani matud pa nahapakan pa og plato ang minor de edad tungod sa kasuko sa lalaki ug nagkuha kini og pisi aron maghikog apan nasanta human gibadlong.

Pipila ka minutos ang nakalabay nakita na lang sa babaye nga nagbitbit na og revolver si Yburan dayun pusil sa iyang ulo.

Ang mga silingan ug ang mga barangay opisyal sa maong lugar maoy nagdala ni Yburan sa Cebu City Medical Center.

Si Violango niingon nga sa iyang nakit-an nga kahimtang ni Yburan lisud na nga mabuhi.

“Sige naman gyud ko ka kita og ingon ato nga kahimtang, lisud kaayo to kay ulo man gud, wala kalapos ang bala,” matud ni Violango.

Nasayran sab ni Violango nga naproblema ang maong lalaki kay iyang nasayran nga nagsakit ang iyang amahan ug gani may mga samad linaslasan pa sa iyang kamot gamit ang kutsilyo sa tuyo nga magpakamatay.

“Mura’g nagsagol nato ang gibati seguro niya, problema sa iyang pamilya ug sa selos niya sa iyang ka live-in,” sigun pa ni Violango.

Nakuha sa kapolisan sa crime scene ang usa ka .38 revolver nga dunay tulo ka bala, usa ka basiyo ug usa ka kutsilyo. – /GMR) (BANAT NEWS)