Palace of Justice paliton gyud sa Kapitolyo

CEBU, Philippines – Interesado gyud ang kagamhanan sa probinsiya sa Sugbo sa pagpalit sa karaan nga Palace of Justice nga nahimutang likod sa Kapitolyo. Niadto’ng nilabay’ng adlaw, si Justice Assistant Secretary Geronimo Sy niduaw sa Kapitolyo. Matud ni Gob. Hilario Davide III nga wala sila’y pormal nga gihisgutan ni Sy bahin sa edipisyo ug igo lang sila’ng nagkumustahay.

Gibutyag sa gobernador nga sa ilang panag-estorya ni Sy, gihangyo niya nga pasultihan si Secretary Leila de Lima nga interesado ang probinsiya nga paliton ang building.

Matud ni Davide nga posible’ng barato na lang unya ang baligya sa maong building ug kung motugot ang DOJ nga paliton, ang ubang buhatan sa Kapitolyo adto na unya ibutang.

Ang probinsya nitanyag sa Korte Suprema ug DOJ sa lote nga gipanag-iya sa Kapitolyo nga adto tukuron ang bag-ong Justice Building.

Ang lote mao ang kanhi nahimutangan sa Department of Agriculture (DA) nga may gilapdon nga 2,000 metros kwadrado.

Ang Korte Suprema nigahin og P500 milyones sa ilang 2015 budget alang sa katukuran sa bag-ong Justice Building.

Ang Palace of Justice giabandonar human sa 7.2 magnitude nga linog niadtong Oktubre 15, 2013. Ang third ug fourth floor sa maong building maoy naguba sa linog hinungdan nga ang tanang personnel sa Palace of Justice gibalhin ngadto sa Quimonda IT Center sa North Reclamation Area.

Ang engineer nga nisusi nagkanayun nga ang maong edipisyo pwede nga ma-retrofit aron magamit kini pag-usab. – /GMR) (BANAT NEWS)