P1M danyos sunog sa D’Bantayan
CEBU, Philippines – Mokabat sa usa ka milyon ka pesos ang danyos sa sunog nga niigo sa usa ka storage room sa daku’ng tindahan sa Poblacion, lungsod sa Daanbantayan sa niaging adlaw.
Matud ni PO2 Victor Avenido, desk officer sa Daanbantayan Police, nga alas 11:45 sa buntag ilang nadawat ang impormasyon nga nasunog ang storage room sa Prince Hyper Mart.
Dali unta nga niresponde ang bombero sa maong lungsod apan wala nahinayun kay wala mo-andar ang makina sa ilang firetruck hinungdan nga nagpatabang sa silingan nga mga lungsod kinsa dali sab nga nakaresponde ug alas 12:45 sa udto nakontrolar ang sunog.
Atol sa maong hitabo, usa ka guwardiya sa tindahan nga si Reynaldo Auman ang naangol human natagakan sa bildo ug nasamad ang iyang bukton.
Napasaka hangtud sa ikaduha’ng alarma ang sunog diin ang kabomberohan sa Medellin, San Remigio ug dakbayan sa Bogo ang nakaresponde. – /GMR) (BANAT NEWS)
- Latest
