Mga mag-uuma sa Tudela may karsada na
CEBU, Philippines - Dili na unya maglisud ang mga mag-uuma sa barangay Villahermosa, lungsod sa Tudela sa Isla sa Camotes sa pagtumod sa ilang mga abot tungod kay gikatakda na ang pagsemento sa ilang karsada.
Si Manuel Estimos Jr. kinsa usa ka mag-uuma ug karon kapitan sa nahisgutang barangay nibutyag nga ang mga mag-uuma maglakaw pa og tulo ka kilometros samtang magpas-an sa ilang mga ani nga ibaligya sa merkado tungod kay walay molahos nga sakyanan sa ilang lugar sa kabati sa karsada.
Sa milabay’ng semana si Gob. Hilario Davide III, Bise Gob. Agnes Magpale, uban nila ni Bokal Miguel Antonio Magpale ug Jude Sybico, Mayor Erwin Yu ug uba’ng opisyal nilusad sa pagpasemento sa Villahermosa-Daan Secante farm-to-market road.
Ang kagamhanan sa probinsiya nihatag og P15 milyones nga budget sa lungsod sa Tudela alang sa maong proyekto gikan sa pundo sa niaging tuig.
Ang municipal engineer nga si Pedro Cisnero nagkanayon nga 1.5-kilometro sa karsada lang ang masemento sa gihatag nga budget ug daku na kini’ng tabang sa mga mag-uuma. Ang pagsemento sa karsada gikatakdang matapos sulod sa upat ka buwan. Subay niini, ang provincial agriculturist nga si Roldan Saragena nagkanayon nga ang maong karsada sa Tudela napili nga gahinan sa pundo tungod kay lapad ang pagpananum og mga utanon sa lugar ug aktibo ang mga mag-uuma.
Matud ni Saragena nga ang tulo ka kilometro nga karsada nagkonektar sa ubang barangay ug mapahimuslan sa mga mag-uuma sa kasikbit nga lugar.
Si Davide nisaad nga dugang road links pa ang ipatuman sa probinsiya aron matabangan ang mga mag-uuma nga mahimong sayun ang pagtumod sa ilang produkto sa kamerkaduhan. (BANAT NEWS)
- Latest
