Sugbuanong kauban sa SAF-44 nakauli na

CEBU, Philippines - Duha sa gibansagang “SAF-44” nga mga Sugbuanon ang nabalik na sa ilang mga kabanay dinhi sa Sugbo kagahapon.

Kini mao sila si Police Officer 1 Windel Candano nga residente sa Barangay Lawaan, lungsod sa Dumanjug ug Police Officer 1 Romeo Cempron nga molupyo sa Barangay Tayud, lungsod sa Consolacion. Kauban sila sa 44 ka mga PNP-Special Action Force commandos nga nakalas human nila gikaengkwentro ang mga teroristang Bangsamoro Islamic Freedom Fighters (BIFF) ug Moro Islamic Liberation Front (MILF) niadtong Enero 25 sa Mamasapano, Maguindanao.

Sayo pa lang sa kabuntagon kagahapon, nagpaabot ang mga mahal sa kinabuhi sa duha ka polis uban sa mga local officials. Alas 7:20 sa buntag dihang miabot ang mga patay’ng lawas nila ni PO1 Candano ug PO1 Cempron uban sa ilang mga asawa nga niabot sa Sugbo sakay sila sa Flight 5J563 sa Cebu Pacific Air.

Ang eroplano diha mitugpa sa MIP Lounge sa Mactan Cebu International Airport (MCIA) diin nagpaabot ang mga kabanay sa mga namatay’ng mga pulis.

Isip pagpakita sa dakong respeto sa ilang sakripisyo alang sa nasud, usa ka arrival honors ang gihimo sa kapulisan sa Police Regional Office-7 diin miabot sa 120 ka mga pulis gikan sa nagkalain-laing unit ang gi-augment lakip na ang mga City ug Provincial Directors.

Ang lungon nga gisudlon sa mga patay’ng lawas nila ni Candano ug Cempron hinay-hinay kini nga gipas-an sa mga pallbearers nga naglakip sa mga kanhi sakop sa Special Action Force nga nadestino na sa nagkalain-laing police units nga pinangulohan ni SPO1 Renante Solante sa Provincial Intelligence Branch.

Ang awit nga “Nearer my God to Thee” maoy gitukar sa marching band samtang nagmartsa ang kapulisan paingon sa mga purlon nga magdala kanila sa tagsa-tagsa nila ka mga lungsod.

Diha sa arrival of honors, sila si Cebu Gov. Hilario Davide III, Consolacion Mayor Teresa Alegado ug Dumanjug Mayor Nelson Garcia.

Makita sa panagway nila ni Dr. Christine-Abucay Cempron ug Michelle Candano, ang mga nabiyuda sa mga namatay nga pulis nga maoy nagdala sa mga lawas sa ilang mga bana ang tumang kagul-anan.

Giduol sila sa Officer-in-Charge sa Cebu City Police Office nga si Señor Supt. Conra Capa kinsa kanhi usab SAF wala makapugong sa iyang emosyon dihang iyang gisaludohan ang mga kaubang nakalas.

Si Davide mipahibalo nga  mohatag sila og tag  P50 mil   nga financial assistance sa mga nabiyaang pamilya ug atimanon usab sa Kapitolyo ang edukasyon alang sa mga anak sa pulis aron makapadayon og eskwela.

Gawas sa hinabang nga ihatag sa kagamhanan sa Probinsiya sa Sugbo ang Consolacion ug Dumanjug mohatag usab og linahi nga hinabang ilabi na si Mayor Alegado kinsa maoy nagluhod sa kasal ni Mr. ug Mrs. Cempron,  si Mayor Garcia usab mohatag og P20 mil nga pinansyal nga tabang ngadto sa pamilya ni PO1 Candano.

Sila si Gobernador Davide ug Mayor Garcia dili pabor sa panawagan sa kadaghanan nga modeklarar og all-out-war ang nasudnong kagamhanan tungod kay daghan ang maapektuhan.

 Dihang nahinabi sa mga tigbalita si Dr. Christine-Abucay Cempron, kini mipadayag nga nadismaya kini nganong wala mosugat si Presidente Benigno  Aquino III sa pag-abot sa SAF-44 gikan Mindanao didto sa Villamor Airbase.

Nanawagan ang pamilyang Cempron nga paspasan ang himoong imbestigasyon aron makab-ot sa mga nabiyaang pamilya ang hustisya sa gidangatan sa mga SAF commandos.   (BANAT NEWS)