Kaalyado ni JVR gitangtanga’g komitiba

CEBU, Philippines - Gitangtangan ni Talisay City Mayor Johnny De los Reyes sa mga katungdanan ang kanhi niya mga kaalyado sa konseho. Gi-revoked ni De los Reyes ang designation ni Bise Mayor Romeo Villarante isip iyang sinaligan sa Local School Board, Local Housing Board ug City of Talisay Traffic Operation Development Authority (CT-TODA).

Si Konsehal Danilo Caballero gitangtang usab isip co-chairman sa Peace and Order Advisory Council ug chairman sa Sports Commission samtang si Konsehal Aldin Diaz isip sinaligan sa mayor sa Tourism Development Council, Local Health Board ug Information Department.

Hinuon si Konsehal Valeriano Ylanan nagpabilin isip administrador sa buhatan sa Urban Planning Management and Infrastructure Planning Development ug administrador sa Economic Zoning and Planning Office.

Nahimo’ng aslum ang relasyon ni De los Reyes ug iyang kanhi kaalyado sa konseho human wala gisuportahan sa kaubanan nga maka-utang og P350 milyones sa bangko aron matukod ang bag-ong Tabunok Public Market.

Nisamot ang wala pagtinagdanay ni De los Reyes ug Villarante ug kaubanan human gilaslasan sa konseho ang gipangayo nga 2015 nga annual budget nga nagkantidad og P1.081 bilyones ngadto na lang sa P539.941 milyones.

"Ingon niani diay ang administrasyon ni JVR nga manggukod? Ang konseho, magka-alyado sa partido o dili, dili mamahimong rubber-stamp sa mayor. Kung unsa man ang nahimo’ng desisyon nako diha sa konseho, kini dili akong personal interest kun dili akong gitan-aw ang kinabag-ang Talisaynon," matud ni Diaz. (Garry B. Lao/GMR)(BANAT NEWS)