75 tons basura nakuha sa SRP
CEBU, Philippines - Nakakolekta ang Cebu City Bantay Dagat Commission og 75 tonelada nga basura gikan sa ilawom sa dagat sa South Road Properties (SRP).
Matud ni BDC Director Ranulfo Sebusa ang mga basura kapin 13 na ka tuig ilawom sa dagat.
Sa sayo’ng bahin sa niaging tuig, adunay survey ang Japanese volunteer divers, Department of Environment and Natural Resources (DENR) ug ang Maritime Police sa kadagatan sa SRP. Nasayran sa maong survey nga adunay mga basura nga nakatabon na sa mga corals ug posible’ng makadaut sa mga isda.
“Adunay mga isda nga posibleng makakaon sa mga plastic,” matud ni Sebusa.
Sigun ni Sebusa ang maong operasyon sa BDC nagsugod niadtong Disyembre hangtud karong buwana gamit ang P1.8 milyones nga pundo. Kini ang una’ng higayun nga gipanguha sa BDC ang mga basura ilawom sa dagat.
Wala gisaad ni Sebusa nga pirmihon nila ang maong operasyon tungod kay nag-agad sila sa budget nga ihatag sa kagamhanan sa dakbayan sa Sugbo.
“Akong giawhag ang katawhan duol sa mga rivers, sapa, coastal areas nga dili magpataka labay sa basura,” sigun niya. (Mechelle P. Florita/GMR)(BANAT NEWS)
- Latest
