35 armas nasakmit

CEBU, Philippines - Usa ka lapad nga operasyon ang gilusad sa mga sakop sa Criminal Investigation and Detection Group-7 nga miresulta sa pagkasakmit sa 35 ka mga armas ug dose ka mga tawo ang nadakpan.

Usa sa nadakpan mao si Edgardo Saucejo, nga taga Barangay Lutac, sa dakbayan sa Naga  nga nakuhaan og usa ka .45 kalibreng pistola, usa ka 5.56mm Assault Rifle ug 120 ka mga nagkadaiyang bala. Gisikop ang suspetsado pinasikad sa search warrant human sa halos taod-taod nga pag- surveillance sa kapulisan.

Matud pa sa hepe sa CIDG-7 nga si Senior Superintendent Ritchie Posadas sulod sa duha ka adlaw ilang gilusad ang gitawag nga “One time-Big time Operations” dinhi sa rehiyon 7.

Apan dunay upat ka tawo apil ang usa ka most wanted person ang nakaeskapo sa operasyon.

Gawas sa mga armas ug  343 ka mga klase- klaseng bala, dul-an usab usa ka milyon ka pesos nga kantidad sa drugas ug drug paraphernalia ang ilang nasakmit.

Sumala pa ni Posadas nga duna pa’y lain nga susamang operasyon nga himuon sa mga mosunod nga mga adlaw ang kapulisan sa managlahing lugar dinhi sa rehiyon.

Si Posadas miingon nga tumong nila nga masumpo ang mga private armed group nga ania karon sa rehiyon.

Ang tanan nga mga armas ipaubos sab sa ballistic examination aron masayran kung ang mga armas wala ba nagamit sa mga krimen dinhi sa Sugbo ug sa rehiyon. (Jojo C. Ugdol/EIM)(BANAT NEWS)