Gidunggab sa ig-agaw

CEBU, Philippines - Gidunggab sa iyang ig-agaw ang usa ka lalaki samtang sila nag-estoryahanay sa sitio Malingin, barangay Punta Engaño, dakbayan sa Lapu-Lapu alas 7:30 sa niaging Huwebes sa gabii. Matud ni SPO2 Allan Pantaleon sa Lapu-Lapu City Police Office nga niila sa biktima nga si Rey Talingting samtang ang suspek mao si Matias Pagobo, pulos residente sa maong dapit.

Base sa inisyal nga imbestigasyon, adunay panaghisgut tali sa laing ig-agaw nga si Jun-Jun, usa ka jeepney driver kinsa residente sab sa maong dapit.

Samtang nag-estoryahanay ang duha, kalit nga mitunga si Pagobo sa likod ni Talingting ug gidunggab sa makadaghang higayun dapit sa likod nga bahin sa lawas, tuo nga dughan ug sa kilid gamit ang hait nga hinagiban.

Niikyas ang suspek samtang dali’ng gidala sa Lapu-Lapu City District Hospital ug gibalhin sa Vicente Sotto Memorial Medical Center ang biktima. (BANAT NEWS)