500 ka balay maapektohan sa MCWD dam

CEBU, Philippines - Mokabat sa 500 ka balay ang apektado sa ugmaron nga dam sa Metropolitan Cebu Water District (MCWD) sa sapa sa Mananga.

Kini nahimutang sa barangay Sinsin ug Pamutan sa dakbayan sa Sugbo ug Campo 4 sa dakbayan sa Talisay.

Si Engineer Ernie Delco, assistant general manager for operation sa MCWD, nagkanayun nga bahin lang sa maong mga barangay ang maapektohan sa Phase 2 dam nga may gihabugon nga 73 metros. Matud niya nga ang Japan International Cooperation Agency (JICA) maoy nagpahigayun sa pagtuon sa proyekto.

Kung madayun ang proyekto, ang MCWD makabomba og 77,000 cubic meters nga tubig matag adlaw diin 55,000 ka pamilya ang masuplayan og tubig sa Metro Cebu.

Matud ni Delco nga kapin sa usa ka tuig na nga nagpahigayun sa ilang pagtuon ang JICA sa proyekto ug karong buwan sa Marso iduso ang final report.

Usa sa makapalangan sa proyekto mao ang pag-relocate sa mga residente sa lugar sumala ni Delco.

Ang JICA giingong nakig-istorya na sa mga opisyal sa kabarangayan nga maapektohan sa proyekto. Samtang gipahibawo ni Delco nga sa mosunod nga lima ka tuig wala sila’y kabalaka kabahin sa suplay sa tubig sa Metro Cebu diin dunay umaabot sila’ng makuha’ng 17,000 cubic meters nga tubig gikan sa lungsod sa Carmen; 20,000 cubic meters sa dakbayan sa Danao ug 7,000 cubic meters sa lungsod sa Cordova diin humana ang bidding.  (BANAT NEWS)