Nagtaud og tarpaulin nakuryentehan

CEBU, Philippines - Kritikal ang kahimtang sa usa ka lalaki nga nakuryentehan samtang nagtaud sa tarpaulin ibabaw sa tindahan sa Salinas Drive, Lahug, dakbayan sa Sugbo kagahapon sa buntag.

Ang biktima nailhan nga si Jason Caballes, hingkod ug nagtrabaho sa usa ka advertising company.

Pasado alas 11 sa buntag dihang nagtaud og tarpaulin ang maong lalaki, iyang nasaghiran ang linya sa kuryente hinungdan nga nakuryentehan.

Sigun pa sa mga nakakita sa hitabo nga nibuto makaduha ka higayun ang linya sa kuryente dihang nasaghiran ni Caballes kinsa natagak sa iyang gitungtungan ug nasangit sa ikaduha’ng andana sa taas sa tindahan.

Ang kauban sa trabaho ni Caballes nga nahinabi sa mga tigbalita apan wala nagpaila niingon nga sa pagkadungog nila sa buto dali sila nga nanagan.

Sa pagresponde sa mga sakop sa Emergency Response Unit Foundation (ERUF) niabot pa og 30 minutos una pa napakanaug ang angol nga lawas sa biktima.

Grabe’ng paso sa lawas gikan ulo hangtud tiil sa biktima.

Sa pagkutlo niini nga balita wala pa’y kasayuran ang Banat News sa kahimtang sa biktima nga dali nga gidala sa Cebu City Medical Center. (BANAT NEWS)