Duha ka discharge summary nakapaduda
CEBU, Philippines - Nahibulong karon ang pamilya sa ginang nga misteryosong namatay sa Mandaue City Hospital tungod sa giingong duha ka discharge summary sheets nga gihatag kanila nga parehas og petsa apan managlahi og nipirma.
Niadtong adlaw’ng Martes nangadto sa Mandaue City Hospital si Cesar Coliflores uban sa iyang abogado nga si Atty. Inocencio Dela Cerna aron pagpangayo sa tanang medical records ni Jocelyn, ang namatay nga asawa ni Cesar niadtong Enero 2.
Apan ang banay nga Coliflores nahibulong tungod kay duha ka discharge summary ang gipagawas sa tambalanan ug gawas nga managlahi ang mipirma nga mga doctor, may nadugang pa sa mga tambal nga nakalista nga matod pa gipainom ngadto sa namatay nga ginang. Ang abogado sa mga Coliflores miingon nga wala masayod ang tambalanan nga duna ‘sab silay nakuhang discharge summary niadtong Enero 9 nga dunay petsa Enero 2 karong tuiga.
Sa gihimo nilang pakisusi sa bag-ong gihatag nga discharge summary niadtong Enero 9, ilang nakita nga dunay kausaban sa dokumento.
Buot nila nga moesplikar niini ang tambalanan kun nganong duha ka discharge summaries ang gipagawas sa susamang petsa ug dili parehas ang mipirma ug unod.
Kun walay aksyon nga makita, mopasaka sila og kaso ngadto sa Professional Regulatory Commission, Ombudsman for the Visayas ug ubang hingtungdang ahensiya. Matud pa sa bana nga si Coliflores nga dili kalikayan nga magduda sila sa nahitabo. (BANAT NEWS)
- Latest
