PNP-SAF wa mananghid — Pnoy
CEBU, Philippines - Si Presidente Benigno Aquino III wala direktang mitubag kun nasayod ba siya sa operasyon sa PNP-Special Action Force nga miresulta sa kamatayon sa 44 ka mga polis sa Mamasapano, Maguindanao.
Si Aquino miatubang sa mga sakop sa media kagahapon aron iesplikar ang nahitabo sa Maguindanao. Sumala pa niya nga dili na praktikal nga kinahanglan pang ipananghid kaniya ang tanang buhaton sa mga polis.
Matud pa niya nga sukad pa niadtong 2010 naghimo na og krimen ang duha ka teroristang Jemaah Islamiyah nga sila si Zulkifli bin Hir alias Commander Marwan nga usa ka Malaysian, ug ang lider sa Bangsamoro Islamic Freedom Fighters nga si Basit Usman. Gibutyag ni Aquino nga Mayo sa miaging tuig gisugdan ang pagpangita sa duha pinasikad sa mga warrants of arrest sa duha tungod sa pagpamomba ug uban pang krimen.
Lehitimong police operation ang gihimo sa SAF tungod kay kongkreto ang ilang impormasyon sa gikahimutangan ug sa mismong balay ni Marwan maong gilusad ang operasyon. Apan dihang nakuha na si Marwan, miresponde si Usman kauban ang mga BIFF hinungdan nga misibog ang mga SAF apan napunta sila sa teritoryo sa MILF ug nahitabo na ang gubat.
Masaligon si Aquino nga motabang ang MILF sa paglutos sa mga miyembro niini nga miapil sa masaker ug malaumon nga motabang usab sila nga iuli ang mga armas ug gamit sa mga polis. Nahibulong usab si Aquino kun nganong wala masayod sila si Interior Secretary Mar Roxas ug PNP OIC Director General Leonardo Espina sa maong operasyon ug apil ni sa susihon sa board of inquiry.
Di usab buot ni Aquino nga dili ipadayon ang Bangsamoro Basic Law tungod kay mausik lang ang sakripisyo sa 43 ka polis ug uban pang nakalas sa kagubot sa Mindanao. (BANAT NEWS)
- Latest
