Signature campaign vs pork barrel gilangaw?

CEBU, Philippines – Niadtong Marso sa miaging tuig gisugdan sa Coalition Against Pork Barrel ang ilang signature campaign nga nagtinguha sa hingpit nga pagwagtang sa Priority Development Assistance Fund (PDAF) nga gihulagway  nga maoy tinubdan sa kurapsyon sa Pilipinas.

Una niini, dinhi sa Sugbo ang target sa organisasyon nga makakuha og 15 porsiyento nga pirma sa mga rehistradong botante diin matag distrito kinahanglan dunay tulo ka porsiyento.

Nasayran usab nga ang deadline sa maong kampanya karong buwan sa Marso ning tuiga apan nasuta nga gamay ra kaayo ang namirma niini.

Base sa ilang update sa signature campaign miabot pa lang og 24, 162 ang namirma gikan sa siyam ka distrito dinhi sa Sugbo.

Si Msgr. Rommel Kintanar mibutyag sa rason kun nganong minus pa ang ilang nakuha nga pirma, una mao nga ilaha kining nibiyaan tungod sa kadaghan sa mga kalihukan nga ilang gihimo.

Daghan pang mga parokya ang wala nakasugod sa kampanya bisan pa man og duna nay gipagawas nga pagtugot ang Catholic Bishops Conference of the Philippines (CBCP) nga ang mga parokya maoy himoon nga venue alang sa signature campaign.

Kuwang usab sa information dissemination ug edukasyon nga gihimo nganong gamay ra ang nipirma. Si Cebu Archbishop Jose Palma sa iyang bahin malaumon nga makab-ot sa grupo ang ilang target aron hingpit nga mawagtang ang pork barrel. – /EIM) (BANAT NEWS)