51 ka balay naugdaw sa basak

CEBU, Philippines – Mokabat sa 51 ka balay ang naugdaw samtang usa ka bombero ang naangol sa sunog nga miigo sa Sitio Alegre Colo, matud pa ni City Fire Marshall Regelio Bongabong nga alas 4:45 nagsugod ang sunog ug nakontrolar alas 5:39 na sa hapon. Sumala pa sa kabomberohan nga nagsugod ang maong sunod sa panimalay ni Particia Mahayahay sa wala pa masayri nga hinungdan.

Gumikan kay sagad sa mga balay sa lugar hinimo sa light materials dali kaayo nga midako ang kalayo hinungdan nga gipasaka sa task force alpha ang alarma.

Si Senior Fire Officer 1 Edwin Andayon nga nahinabi sa Banat News miingon nga duna’y usa ka bombero ang naangol atol sa hitabo sa wala pa masayri nga hinungdan apan dili ra sab kini grabe. Sa impormasyon gikan sa Department of Social Welfare and Services (DSWS) nga gibanabana nilang moabot og 438 ka mga indibidwal ang nabiktima nga gilangkoban og 93 ka pamilya.

Kasamtangan silang gipahimutang  sa Basak Community School sa maong barangay.

Ang hepe sa kabomberohan miingon nga usa sa ilang nasugatan nga kalisod sa pagresponde sa maong sunog mao ang kagamay sa dalan sa lugar.

Si Bongabong miingon nga mas maayo unta  nga ma –reblocking ang maong barangay aron dili na sila maglisod sa sunod kung duna ma’y lain nga sunog  nga mahitabo  sa maong lugar. “Lisod kaayo kay gamay kaayo ang dalan, maayo na lang gani kay kusog ang tubig sa fire hydrant,” matud pa ni Bongabong. Nagpadayon pa ang imbestigasyon sa kabomberohan aron pagtino sa hinungdan sa maong sunog nga mibilin sa gibanabana nga P700,000 ang danyos. – /EIM)  (BANAT NEWS)