4,000 nakapahimulos sa medical mission
CEBU, Philippines - Nikabat sa 4,000 ka pasyente sa Sugbo ang nakapahimulos sa medical mission sa Mano-a-Mano International Relief Organization, usa ka US-based non-profit organization.
Ang medical mission gipahigayun sa lungsod sa Balamban ug Daanbantayan niadtong milabay’ng semana.
Ang New Jersey-based organization dunay 58 ka volunteers gikan sa abroad nga gilangkuban sa mga langyaw ug balikbayans kinsa 13 kanila ang gikan sa Sugbo. Katunga sa gidaghanon sa volunteers mga nurse.
Si Dr. Lorna Bayes, founder sa Mano-a-Mano International Relief Organization, nalipay nga nakaabot sa Sugbo.
Sa milabay’ng tuig pa gitakda ang maong medical mission dihang ang lider sa Abellana National School Alumni Federation Inc. nga si Engr. Daisy Toledo nakigkita sa ilang grupo sa Iloilo. Ang grupo sulod na sa pito ka tuig nagpahigayun og medical mission sa nasud.
Ang mga serbisyo nga gihatag sa grupo ngadto sa mga pasyente mao ang general medicine, pediatrics ug minor surgery ug nanghatag usab sila og mga tambal ug eyeglasses. (BANAT NEWS)
- Latest
