Barko naaberya, 79 ka pasahero luwas

CEBU, Philippines - Luwas ang 79 ka pasahero nga nakabalik sa pantalan sa Polambato sa dakbayan sa Bogo alas 10:30 niadtong Sabado sa gabii human naaberya  ang Super Shuttle Ferry 10 nga padulong unta sa Palompon, Leyte.

Ang barko nibiya sa pantalan alas 12 sa udto ug gikatakda unta nga moabot sa Palompon alas 3 sa hapon sa maong adlaw.

Si Ruel Arranchado, magtutudlo sa Tominjao National High School sa lungsod sa Daanbantayan miasoy nga ang iyang ig-agaw nga sakay sa maong barko ang nakapahibawo kanila nga alas 7 na sa gabii diha pa sila tunga sa lawod ug wala’y pagkaon nga gihatag.

“Mga 9pm gi-tow ang barko pabalik sa Polambato Port. Alas 12 midnight sila naabot sa port dayun nakapanihapon intawon,” matud ni Arranchado.

Ang mga awtoridad giingong alas 8 na sa gabii nahibawo sa insidente.

Si Bogo City Mayor Celestino “Junie” Martinez Jr. gitawgan usab sa usa ka pasahero sa barko alas 7:30 sa gabii ug nangayo og rescue.

Gimandoan ni Martinez si City Administrator Max Suico, ang Local Disaster Risk Reduction Management Office, Port manager, Bantay Dagat, Police, Bureau of Fire Protection, Department of Education ug Barangay Peacekeeping Action Team sa pagresponde ug pagtabang sa mga pasahero.

Ang grupo nga Northern Allied Streetbikers Association (NASA) sa Bogo ang nipagamit sab sa ilang ambulansiya.

Si Bokal Celestino “Tining” Martinez III ang nakig-alayon dayun sa Kapitolyo.

Giawhag ni Bokal Martinez ang mga opisyal sa dakbayan sa Bogo sa pagsusi sa mga barko nga magbiyahian gikan sa dakbayan aron pagseguro nga dili na masubli ang susamang insidente.

(BANAT NEWS)