Gov’t offices naugdaw

CEBU, Philippines - Naugdaw g’yud ang mga buhatan sa gobiyerno lakip na ang Danao Police Station diha sa karaan nga edipisyo nga ilang nahimutangan nga ginama sa light materials tungod sa sunog alas -9 ang takna sa miaging Sabado sa gabii.

Matud pa ni Police Officer 2 Ronald Gomez nga nahinabi sa Banat News, ang una nilang namatikdan nga misilaob mao ang ilang atop nga diin usab nahimutang ang mga lokal nga buhatan sa Department of Interior and Local Government (DILG), Department of Environment and Natural Resources (DENR), Department of Agriculture (DA), buhatan sa Bureau of Parole, Senior Citizen Office, Public Employment Service Office (PESO) ug uban pa.

Matud pa ni Gomez  nga naugdaw ang ilang record section, investigation section ug operations section nga nahimutangan sa ilang mga computers ug uban pa nilang mahinungdanong butang.

Dali nilang gipagawas ang19 ka mga priso sa detention cell ug  temporaryong gibalhog sa Danao City Jail apan dunay pipila ka armas ang naapil sa sunog.

Si Gomez miingon nga ang kabomberohan sa Dakbayan sa Danao maoy unang nakatubag sa maong alarma nga mipaubos dayon sa alarma nga general alarm. Mitabang dayon ang kabomberohan gikan sa silingang kalungsoran nga naglakip sa Carmen, Compostela ug Liloan.

Si Senior Fire Officer 2 Eduardo Rizalde nga maoy imbestigador sa kabomberohan sa maong dakbayan miingon nga dili pa nila matataw ang hinungdan niini. Apan usa sa ilang gitan-aw mao ang electrical overload, nasayran nga ang maong building pwerte nang karaana.

Samtang si Senior Police Officer 1 Ildefonso Prosia miingon wala hinuoy naangol sa mga bilanggo nga nabalhog sa ilang detention cell tungod kay sa pag-ulbo sa kalayo dali man nilang gipagawas. (BANAT NEWS)