Truck boy napisat sa mixer

CEBU, Philippines -  Nadat-ogan patay sa concrete mixer truck ang usa ka truck boy human nga naligid sa kilid sa dalan ang maong trak diha sa Barangay Tigbawan sa lungsod sa Tabuelan.

Ang namatay naila nga si Mateo Moreño, trabahante sa Duros Construction taga Tabunok, Tabuelan. Si Police Officer 3 Gilbert Allego, desk officer sa Tabuelan Police Station miingon nga si Jonathan Magdadaro, 42, maoy nag-drive sa mixer.

Matud pa ni Allego nga samtang nagtungas ang mixer truck sa dalan gisuwawan sa adlaw  si Magdadaro ug nabutahan sa dalan hinungdan nga napunta kini sa kilid sa dalan.

Dihang natagak ang tuong ligid sa mixer truck natagak usab ang biktima gikan sa  gilingkoran niini sa ibabaw sa atop sa driver's seat ug nasundan kini sa trak nga natakilid hinungdan nga napisat ug namatay. Gitanggong na karon sa Tabuelan Police Station ang drayber ug gihulat pa sa kapolisan kung mokiha ang kabanay sa biktima.

Samtang maayong pagkaputol sa punoan sa lubi samtang naangol ang duha ka sakop sa Philippine Navy human nga nabangga sa lubi ang M35 truck nga ilang gisakyan.

Ang naangol naila nga sila si Petty Officer 3 Michael Bayocboc ug si Petty Officer 1 Jerick Tejero.

Si Police Officer 2 Catalino Ricablanca, desk officer sa Ginatilan Police Station, miingon nga padulong unta mobilar sa haya sa usa ka retirado nga opisyal sa navy sa lungsod sa Samboan ang grupo. Apan sa pag-abot sa kurbadahon nga dapit wala makabantay ang drayber niini nga si Petty Officer 2 Lino Padilla, 41, ug nadiretso kini og bangga sa punoan sa lubi.

Ang trak adunay sakay nga lima ka mga opisyal ug mga navy reservists nga mohimo og 21-gun salute sa paglubong sa maong naval officer nga ilang adtuon.

Matud pa ni PO2 Castillano nga daling gidala sa Moalboal District Hospital ang duha ka nangaangol apan nakagawas ra dayon sila ug nakapadayon sa ilang destinasyon. (BANAT NEWS)