Speed limit sa SRP 40kph na lang
CEBU, Philippines - Si Cebu City Mayor Michael Rama mibahad nga iyang sirad-an ang South Coastal Road kun di mapatuman ang saktong traffic rules sa South Road Properties sugod karong adlawa.
Gitahasan ni Rama ang mga pangu sa City Traffic Operations and Management, Department of Engineering and Public Works, SRP management office ug Cebu-Bus Rapid Transit Office pag-implementar og dugang traffic measures sa maong dapit aron maminusan ang aksidente.
Buot ni Rama nga paubsan ang speed limit gikan 60 kph ngadto 40 kph ug ang kalay-on sa mga sakyanan mosubay sa “2-car distance” pinaagi sa pagtaod og rumble strips, reflectorized road markings ug flashing “caution” lights.
Matud ni Rama nga kinahanglan usab motabang ang DPWH ug SRP office pagtaod og dugang lampposts aron nga mas mohayag ang dalan sa SRP.
Kini human nasuta ni Rama nga nagkadaghan ug nagkagrabe ang kaso sa aksidente sa SRP nga miabot na og kapin usa ka libo gikan tuig 2010.
“We should treat this not just as a crisis but a big disaster. They should put their axe together to address this pressing concern. The mayor expresses police power in order to address this traffic crisis at the SCR,” sumala ni Rama.
Matud ni Rama nga kinahanglan matul-id ang regulasyon sa dagan sa trapiko diha sa SRP isip preparasyon sa mga dagkong kalihokan sama sa Asia-Pacific Economic Cooperation Summit karong tuig, International Eucharistic Congress ug Sinulog festival sunod tuig.
Si CITOM operations chief Joy Tumulak nagkanayon nga mi-deploy na sila og dugang traffic mobile ug gitaod na usab ang mga warning signage.
Si Tumulak mihangyo ngadto sa mga motorista sa pagkooperar ug pagsunod sa traffic signage aron paglikay sa disgrasya.(Kristine Quintas/EIM)(BANAT NEWS)
- Latest
