Negosyante gipusil sud sa iyang tindahan

CEBU, Philippines - Grabeng naangol ang usa ka lalaki human kalit gipusil sa duha ka lalaking nagsakay og motorsiklo samtang diha kini sa sulod sa iyang tindahan sa Barangay Tayud, Lungsod sa  Consolacion.

Si Senior Police Officer One Edmund Melendrez  sa Consolacion Police Station miila sa biktima nga mao si Jimmy Auman, 41, nagpuyo sa maong dapit.

Matud pa ni Melendrez nga naglingkod sa iyang tindahan ang biktima dihang ang wala hiilhing lalaki ang miduol ngadto sa biktima nga naglingkod og dayong pusil niini sa iyang bukobuko.

Human sa maong pagpusil dali nga mibalik sa nagpaabot nga motorsiklo ang suspetsado ug mipabulhot sa pagpadagan palayo sa maong dapit.

Si Melendrez miingon dali nga gihatod sa usa ka pribadong tambalanan sa dakbayan sa Sugbo ang biktima ug padayon pa karon nga giatiman sa mga doktor.

Matud pang Melendrez  nga ang biktima mibutyag nga duna siyay nakabingkil nga mga kabanay tungod sa road right of way diha sa ilang luna. (BANAT NEWS)