De kolor nga pedestrian lane sa Mandaue

CEBU, Philippines - Pormal na nga gilusad kagahapon sa buntag ang labing una’ng rainbow pedestrian diin makita ang lain-lain nga kolor nga gipintal sa pedestrian lane sa Highway Wireless, Subangdaku, siyudad sa Mandaue.

Gitumong kini aron pagpakita sa pagka-gender conscious sa siyudad.

Lahi sa naandan nga pedestrian lane nga black and white, karon makita kining pedestrian lane nga gipintalan sa color red, orange, blue ug purple.

Mismo si Mandaue City Mayor Jonas Cortes uban ni Subangdaku Barangyay Kapitan Ernie Manatad ang nangulo sa pagpintal uban sa artist nga si Amado Seno.

Gitug-an ni Cortes nga ang ilang gihimo usa ka paagi sa pag-ila sa mga LGBT kon third sex sa katilingban.

Ang rainbow pedestrian sa Subangdaku labing una sa Asya ug sa nasud.

Kini gihimo human usab nagmalampuson ang murals o pagpintal sa flyover sa Subangdaku diin ang gipanghulagway mao ang mga simbolo sa pagpreserba sa kalikupan.

Gipasabot ni Seno nga daku’ng natabang ang art alang sa usa ka adbokasiya sama sa pagwagtang sa diskriminasyon.

Ang rainbow color nagsimbolo og diversity ug pagdawat kang bisan kinsa.

Daku ang pasalamat sa presidente sa Kaabag sa mga Kabayutan ug sa Subangdaku nga niini’ng paagiha gipakita sa kagamhanan ang paghatag og importansya kanila nga mga lesbian, gay, bisexual ug transgender (LGBT).

Nanghinaut si Cortes nga mahimo kini’ng sumbanan sa ubang lugar sa Mandaue City ug sa Sugbo nga mohatag og pagtagad ug pagka-gender conscious aron way mahitabong diskriminasyon.  (BANAT NEWS)